பூமகள் சிதறிவிட்ட மென்மீனின் கூட்டமோ?
தினங்காலை அலைமகளை வரவேற்கும்
மனங்கொள் புள்ளியிலாப் பூக்கோலமோ?
சுந்தரமாய்ப் பசுங்குழவி வாய்விரிக்கும்
செந்தமிழ் மழலை மொழிகளோ?
சுகமாய்க் காற்றில் கலந்திடும் மணமது
தாமாய்ப் பரவும் நல்லோர் புகழோ?
வேற்றுமையி லொற்றுமை காணெனத்
தேற்றுந் தேசிய ஒருமைப்பாடோ?
விழிவிரித்து வண்டினை ஈர்க்கும் பாங்கது
வழிக்காளை மயக்கும் பெண்மகள் அழகோ?
ஆயுளில் சிறுத்தாலும் வாழ்வினில் சிரித்திடெனச்
சூசகமாய்ப் பாடந்தரும் ஈரங்குலக் குறள்நலமோ?
புறமுதுகு காட்டாப் பெருமகனைத் தினமுந்
திறமுடன் களமிறக்கும் வீரத்தாய்க் குலமோ?
தென்றல் வருடிடத் தெளித்திடும் மதுத்துளி
வென்றிடப் புவியரசின் இலவசத் திட்டமோ?
எதனொடு சேர்ப்பினும் அழகுக்கழ கூட்டும்
பதமான இயற்கை யினழகு நிலையமோ?
கருத்துகள் இல்லை:
கருத்துரையிடுக