உலகைப் புரட்டிப் போட்ட 100 அறிவியல் கண்டுபிடிப்புகள் - 34 கலோரி

34. கலோரி - Calories (Units of Energy)

கண்டறிந்தவர்: ஜேம்ஸ் ஜூல் ( James Joule)

கண்டறிந்த ஆண்டு: 1843

சக்தி என்பது பலதரப்பட்டதாக, பல மூலங்களிலிருந்து, பலவடிவங்களில் நமக்குக் கிடைக்கின்றது. வெப்ப சக்தி, மின் சக்தி, காந்த சக்தி, இயங்கு சக்தி என்று பல சக்திகளும் இருக்கின்றன. அச்சக்திகளை ஒன்றிலிருந்து மற்றொன்றாக மாற்றிக் கொள்ள இயலும் என்பதை இப்போது நாம் உணர்ந்திருக்கின்றோம். இவ்வாறு மாற்றும் போது மொத்த சக்தியையும் நம்மால் மாற்ற இயலுவதில்லை. சிறிய பகுதியை மாற்றம் நிகழும் போது இழக்கின்றோம் என்றாலும் மாற்றமுடியும் என்பதும், அதை அறிந்திருக்கின்றோம் என்பதும் தொழில் மற்றும் அறிவியல் வளர்ச்சிக்குப் பெரிதும் உதவியிருக்கின்றது. இருந்த போதிலும் 200 ஆண்டுகளுக்கு முன்பு வரை இவ்விஷயத்தை யாரும் அறிந்திருக்கவில்லை.

ஜேம்ஸ் ஜூல் எந்த ஒரு சக்தியையும் அதற்குச் சமமான வெப்ப சக்தியாக மாற்ற இயலும் என்று கண்டறிந்தார். இதன் மூலம் சக்தியின் பொதுவான தன்மையை அனைவரும் உணரச் செய்தார். அனைத்து சக்திகளும் சமமானவையே என்றும் நிரூபணமானது. மேலும் 40 ஆண்டுகள் கழித்து சக்தியைச் சேமித்துப் பாதுகாக்கும் விதியைக் (Conservation of energy) கண்டுபிடிக்கவும் ஆதாரமாக இது இருக்கின்றது.

எவ்வாறு கண்டறிந்தார் என்று காண்போம்.

இங்கிலாந்தின் லான்சைசரில் மதுபானம் உற்பத்தி செய்து தொழில் செய்து வந்த ஒரு வசதியான குடும்பத்தில் 1818ன் கிறிஸ்துமஸ் தினத்தில் பிறந்தார் ஜேம்ஸ் ஜூல். பள்ளிக்குச் செல்லாமல் வீட்டிலேயே தனி ஆசிரியர்களை வைத்துப் பாடங்களைக் கற்றார் ஜூல். தனது 20வது வயதில் குடும்பத்தொழிலான மதுபான உற்பத்தியில் ஈடுபட ஆரம்பித்தார்.

உடனேயே தனது தொழிலில் நீராவி முறையிலிருந்து மின்சார முறைக்கு மாற்றி மதுபானம் உற்பத்தி செய்ய முடியுமா என்று ஆராய்வதைத் தனது பிரதான பணியாக ஆக்கிக் கொண்டார். இயந்திரங்களையும், அவை சக்தி வெளியிடுவதையும் பற்றி ஆர்வத்துடன் கற்றறிந்தார். மின்சக்தி சுற்றுகள் பற்றியும் அறிந்தார். மின்கம்பிகளின் வழியே மின்சாரம் பாயும் போது அவை சூடாவதைக் கண்டு அதிசயித்தார். வெகுவிரைவிலேயே செல்லும் மின்சாரத்தின் ஒரு பகுதி சூடாவதற்குச் செலவிடப்படுவதை உணர்ந்து கொண்டார்.

அவ்வாறு வெப்பமாவதற்குச் செலவிடப்படும் சக்தியின் அளவு எவ்வளவு என்று அறிந்து கொள்வதில் மிகுந்த ஆர்வம் காட்டினார். மேலும் மின்சக்தியிலிருந்து வெப்பசக்தி எவ்வாறு உருமாறுகின்றது என்பதையும் கண்டறிய முனைந்தார். அவரது ஆய்வுச் சோதனைகளின் போது அவர் பாதுகாப்புக்கு முக்கியத்துவம் தரவில்லை. ஒருசமயம் அவரது பணிப்பெண் மின்சாரத்தாக்குதலால் மயங்கி விழுந்த சம்பவமும் நிகழ்ந்தது! இறுதியில் அவர் மதுபான உற்பத்தியை மின்சாரமுறைக்கு மாற்றாவிட்டாலும் சக்தியை ஒரு வடிவிலிருந்து இன்னொரு வடிவுக்கு மாற்றும் ஆராய்ச்சியில் அவரது கவனம் திரும்பியது.

ஜூல் ஒரு ஆத்திகவாதி. அடிப்படையிலேயே அனைத்து வகையான சக்திகளுக்கும் மூலாதாரம் ஒன்றாகத் தான் இருக்கவேண்டும் என்று ஆழ்ந்த நம்பிக்கை கொண்டிருந்தார். வெப்ப சக்தியே அனைத்துக்கும் மூலசக்தி என்றும் அந்த இயல்பான சக்தியிலிருந்தே மற்ற சக்திகள் அனைத்தும் அவதாரம் எடுப்பதாகவும் சந்தேகித்தார்.

ஜூல் தனது கவனத்தை இயந்திர சக்தியை வெப்ப சக்தியாக மாற்றுவதில் செலுத்த ஆரம்பித்தார். உண்மையில் இயந்திரத்தால் உருவான எந்த ஒரு சக்தியின் மூலமும் நகரும் ஒரு பொருள் (அச்சக்தியைத் தொடர்ந்து கொடுக்காத போது) காலப்போக்கில் நின்று விடுகின்றது. அப்படியானால் கொடுத்த சக்தியெல்லாம் என்ன தான் ஆயிற்று? இயங்குசக்தியிலிருந்து வெப்பசக்தியை அளக்க நீரைப் பயன்படுத்தி பலவித சோதனைகளை ஜூல் மேற்கொண்டார்.

ஜூலின் இரண்டு பரிசோதனைகள் மிகவும் பிரபலமானது. முதலில் காற்றடைக்கப்பட்ட ஒரு செம்பு உருளையை நீருக்குள் அமிழ்த்தி நீரின் வெப்பத்தை அளந்து கொண்டார் ஜூல். பின்னர் அந்த உருளைக்குள் சுற்றுப்புறக் காற்றழுத்ததைக் காட்டிலும் 22 மடங்கு அதிக அழுத்தம் ஏற்படுமாறு காற்றைச் செலுத்தினார். வாயுவிதிகளின் படி, அதிகக் காற்றழுத்தம் அதிக வெப்பத்தை உருவாக்க வேண்டும். ஆம்! நீரின் வெப்பம் 0.285 டிகிரி பாரன்ஹீட் ஏறியிருந்தது. இயங்கு சக்தி அங்கு வெப்பசக்தியாக மாறியிருந்தது.

அடுத்த சோதனையாக, ஒரு செங்குத்தான தண்டில் இருபுறமும் துடுப்புகளை ( மிதிவண்டியின் பெடல் போல) அமைத்து நீருக்குள் அமிழ்த்தி, துடுப்புகளைத் துழாவிச் சுழலச் செய்தார். அப்போதும் நீரின் வெப்பம் அதிகரித்தது. அதன் மூலம் இயங்குசக்தியின் ஒருபகுதி வெப்பசக்தியாக மாற்றமடைவது நிரூபணமானது.

இருந்தாலும் ஜூல் தனது ஆராய்ச்சியைப் திரவ உலோகமான பாதரசத்தின் பக்கம் திருப்பும் வரை அவரால் ஒரு முடிவுக்கு வரமுடியாமலே இருந்தது. பாதரசத்தை வெறுமனே கலக்குவதன் மூலமே அதன் வெப்பநிலை சீரான அளவில் ஏறுவது சோதனையில் அறிய முடிந்தது.

முடிவாக, ஜூல் எந்த ஒரு சக்தியையும் அதற்குச் சமமான வெப்ப சக்தியாக மாற்றமுடியும் என்று கண்டறிந்தார். 1843ல் சக்தியின் பொதுவடிவான வெப்பசக்தியை அளப்பதற்கான அளவீடையும் அறிமுகம் செய்தார். இயற்பியலாளர்களும் வேதியியல் வல்லுநர்களும் அவரது அளவீடைப் பயன்படுத்த ஆரம்பித்தனர். அதற்கு ஜூல்ஸ் என்றும் பெயரிடப்பட்டது. உயிரியல் வல்லுநர்களோ 4.18 ஜூல்ஸை ஒரு கலோரி என்று பெயரிட்டு அப்பெயரில் அழைக்க ஆரம்பித்தனர். எந்த ஒரு சக்தியையும் வெப்ப சக்தியாக மாற்ற முடியும் என்று கண்டறிந்ததன் மூலம், சக்தி, இயக்கம் மற்றும் அது சார்நத நுட்பங்களில் பலமுன்னேற்றங்கள் ஏற்பட வழிவகுத்தார் ஜூல்.

அலைகள் நிற்கட்டும்

என்னுலகம் சகலமும் ஒருநிமிடம் நிறுத்தினேன்.
முன்புறக் கண்களைக் கதவடைத்துப் பூட்டிக்கொஞ்சம்
காதுகளைக் கண்களாக்கி அகந்திறந்து பார்த்தேன்.
ஒலிகளே ஒளிகளாய் புலனெங்கும் ஓடக்கண்டேன்.
எம்மொழியாலும் சொல்லவியலா ஒலியெழுத்தில்
நாள்முழுதும் ஓயாது ஜெபித்தது கடிகாரம்.
எங்கோ தூரத்தின் ஓரத்தில் இடவலமாய்
இரைச்சலுடன் வாகனத்தின் தரைதேய்ப்பு
பாய்ந்து தோய்ந்து தேய்ந்து மாய்ந்தது.
கணினியும் அதன்காற்றாடியும் எனக்கே எனக்காய்
மாடாய் உழைக்கின்ற சப்தமும் நிறைந்தது.
மௌனத்தின் விளிம்பு வரை சென்றாலும்
பெருங்கடலைத் தீண்டவோ தாண்டவோ
திராணியற்று நின்றுவிட்டேன்.
அலைகள் நிற்கட்டும்!

முகமூடிகள்

சுயத்தை மறைக்க‌
ஆதாம் ஏவாளின்
அரையில் இருந்து
சிரம் வந்து சேர்ந்த
நவீனப் பயணிகள்

உள்ளே புழுக்கள் நெளிதலையும்
வெளியே பழுத்த தோலாய்
உள்ளே நமுட்டுச் சிரிப்பையும்
வெளியே அன்பு நீவுதலாய்
மாற்றிக் காட்டும் சௌகரியங்கள்

ஆட்டி வைப்பவன் ஒருவன்
ஆடித் தீர்ப்பவன் கருவி
பாரீரே பாரீர் என்றே
பகுத்தறிந்து பார்க்கச் சொல்லும்
நிதர்சன நாத்திக ஆத்திகங்கள்.

அண்ணனுக்குத் தம்பியாய்
மகனுக்கு அப்பனாய்
தோழனுக்குக் தோழனாய்
பகைவனுக்குப் பகைவனாய்
நடித்துத் தான் பாரென்றே
சொன்ன கண்ணனின்
கீதைக் கருவிகள்.

ஒருமித்த காதலின்றியே
காதல் கொண்டதாய்
நடிக்கையில் மட்டும்
கொஞ்சமும் பொருந்தாமல்
உறுத்தும் நெருடல்கள்.

உலகைப் புரட்டிப் போட்ட 100 அறிவியல் கண்டுபிடிப்புகள் - 33 - பனி யுகம்

33. பனி யுகம் (Ice Ages)

கண்டறிந்தவர்: லூயி அகாசிஸ் (Louis Agassiz)

கண்டறிந்த ஆண்டு: 1837

புவியின் தட்பவெப்ப நிலை அதிகமான மாறுதல் ஏதுமின்றியே எப்போதும் இருக்கின்றது என்பதே அனைவரின் யூகமாக இருந்தது. லூயி அகாசிஸோ ஐரோப்பா முழுதும் ஒரு காலத்தில் பனிப்பாறைகளாய் இருந்தது என்று அத்தாட்சியுடன் கண்டுபிடித்துச் சொன்னதும் தான் உலகத்தின் மொத்த தட்பவெப்பநிலையும் எப்போதும் மாறுதலுக்கு உட்படுகின்றது என்று உணரமுடிந்தது.

அவரது இந்தக் கண்டுபிடிப்பினாலும் அயராது அவர் சேர்த்த தகவல்களாலும் புவியின் ஆரம்ப வரலாறு பலவித ஆராய்ச்சிகளின் மூலம் அறிய வந்தது எனலாம். எப்படிக் கண்டறிந்தார் லூயி?

லூயி அகாசிஸ் தன்னை ஒரு கல்லூரிப் பேராசிரியர் என்பதைக் காட்டிலும் புவியியல் வல்லுநராகவே கருதிவந்தார். அவரது சொந்த நாடான ஸ்விட்சர்லாந்து நாட்டின் ஆல்ப்ஸ் மலைகளில் பல வாரங்கள் மலையேறுவதை வாடிக்கையாகக் கொண்டிருந்தார். 1820ன் இறுதியில் ஆல்ப்ஸ் மலைப் பள்ளத்தாக்குகளின் முகப்புகளில் இருந்த பனிப்பாறைகளில் பல ஆர்வமூட்டும் வடிவங்கள் இருப்பதைக் கண்டார். முதலில் பனிப்பாறைகளின் அடிப்பாகம் ஆங்கில எழுத்தான 'U' வடிவிலும், அதன் பள்ளத்தாக்கின் கீழ்ப்பாகம் தட்டையாகவும் இருப்பதைக் கண்டார். அதே சமயத்தில் நதியினால் உருவான பள்ளத்தாக்குகள் ஆங்கில எழுத்தான 'V' வடிவில் இருப்பதையும் கண்டார். முதலில் இப்பனிப்பாறைகள் இயற்கையாகவே இப்பள்ளத்தாக்குகளில் உருவாகி இருக்கும் என்று ஊகித்தார் லூயி. பின்னர், இந்தப் பனிப்பாறைகளே இப்பள்ளத்தாக்குகளை 'U' வடிவத்துக்குச் செதுக்கியிருக்கின்றன என்று உணர்ந்தார்.

அடுத்ததாக பனிப்பாறைப் பள்ளத்தாக்குகளின் பக்கவாட்டுப் பாறைகளில் குறுக்காகப் படுக்கை வசத்தில் பல கோடுகளும் கீறல்களும் உருவாகி இருப்பதையும் கண்டார். இக்கோடுகள் பனிப்பாறைகளின் தற்போதைய இருப்பிடத்துக்கு ஒரு மைலோ அல்லது அதற்கு மேலாகவோ தள்ளி இருக்கக் கண்டார். மேலும், இவ்வாறு உருவான பல பள்ளத்தாக்குகளிலும் அதிசயிக்கத் தக்கவகையில் உருண்டையான பெரிய பாறைகளும், கற்குவியல்களும் அவையாவும் எப்படி வந்தன அல்லது உருவாகின என்று கண்டறிய முடியாத வண்ணம் இருப்பதைக் கண்டார்.

விரைவிலேயே, இந்தப் பனிப்பாறைகள் யாவும் அளவில் மிகப் பெரியதாகவும் மிக நீளமானதாகவும் வெகு காலத்துக்கு முன்பு இருந்திருக்க வேண்டும் என்றும், இப்பள்ளத்தாக்குகள் உருவாகவும், அவ்வாறு உருவாகும் போது பாறைகளை உருட்டி வந்து வழியில் கீறல்களையும், பள்ளத்தாக்கின் அடியில் விநோதமான கற்குவியல்களும் உருவாக இவையே காரணமாக இருந்திருக்க வேண்டும் என்றும் ஊகித்தார் லூயி.

பின்னர் 1830ன் ஆரம்பத்தில் அவர் இங்கிலாந்திற்கும் மற்றும் வடக்கு ஐரோப்பாவின் பள்ளத்தாக்குகளிலும் சுற்றுப்பயணம் மேற்கொண்டார். இங்கும் இவர் 'U' வடிவப் பள்ளத்தாக்குகளையும், குறுக்குவாட்டுக் கோடுகளையும் விநோதமான கற்குவியல்களையும் கண்டு அதிசயத்தில் ஆழ்ந்தார்.

ஸ்விட்சர்லாந்தில் இவர் கண்ட அதே காட்சி இங்கேயும் இருக்கக் கண்டார். ஆனால் அப்பகுதியைச் சுற்றிலும் பல நூறு மைல்களுக்கு எவ்விதப் பனிப்பாறைகள் மட்டும் காண இயலவில்லை! 1835ல் தான் அவரால் மற்றும் யாராலும் ஊகிக்கமுடியாத உண்மை அவருக்குள் நங்கூரம் பாய்ச்சியது! பல ஆண்டுகளுக்கு முன் ஐரோப்பா முழுதுமே பனிப்பாறைகளால் சூழப்பட்டிருக்க வேண்டும். இப்போது போலவே முற்காலமும் இருந்திருக்க வேண்டியதில்லை. புவியின் வெப்பநிலை மாறிக் கொண்டே இருக்கும் என்று ஊகித்தார்.

அவரது கண்டுபிடிப்பை உறுதிப்படுத்திக் கொள்ள வேண்டுமென்றால் அதற்கு அத்தாட்சி தேவை அல்லவா? இதற்காக அவரும் அவரது உதவியாளர்களும் இரண்டு ஆண்டுகள் ஆல்ப்ஸ் மலைப்பகுதி முழுவதிலும் காணும் பாறைகளின் வடிவங்கள், அவற்றிலுக்கும் இயற்கைக் குறியீடுகள் போன்றவற்றைக் கவனத்துடன் சேகரித்தனர்.

1837ல் தனது கண்டுபிடிப்பை அவர் வெளியிட்ட போது புவியலாளர்கள் அனைவரும் வியப்பில் வாய் பிளந்தனர்! அது வரை எந்த ஒரு விஞ்ஞானியும் இவரைப் போல் தளத் தகவல்களைச் சேகரித்துத் தனது கண்டுபிடிப்பை உறுதிப்படுத்தியதில்லை என்று பாராட்டப்பட்டார் லூயி. அவரது கண்டுபிடிப்பு அதுவரை கண்டுபிடிக்கப்பட்ட புவியின் வரலாறுகளைத் தகர்த்தெறிவதாக இருந்தாலும், அவர் சேகரித்த தகவல்களின் தரத்தைக் கண்டு உடனடியாக அதை ஏற்றுக் கொண்டு தன்னைத் திருத்திக் கொண்டது புவியியல்.

அகாசிஸ் பனியுகம் எவ்வாறு இருந்திருக்கக் கூடும் என்று அழகான படங்களின் மூலம் விளக்க முனைந்தார். ஆனாலும், 1920 வாக்கில் யூகோஸ்லேவியாவின் Milutin Milankovich தான் இதன் காரணத்தைக் கண்டறிந்தார். அதாவது சூரியனைப் புவி சுற்றும் பாதை மிகச் சரியான வட்டமாகவோ, அல்லது ஒரே வடிவத்தினை உடையதாகவோ எப்போதுமே இருந்ததில்லை. அவரது ஆராய்ச்சியின் படி, புவியின் சுற்றுப் பாதை வட்ட வடிவத்திலிருந்து நீள வட்ட வடிவத்திற்கு 40000 ஆண்டுகளுக்கு ஒரு முறை ஊசலாடிச் சென்று வருகின்றது என்பது நிரூபணமானது. புவி நீள்வட்டப்பாதையின் போது சூரியனை விட்டுத் தொலைவில் செல்லும் சமயத்தில் பனியுகங்கள் உருவாகின்றன. புவியின் பல பகுதிகள் பனியால் மூடப்படுகின்றன. தட்பவெப்பநிலை மாற்றங்கள் அதிசயிக்கத்தக்க வகையில் நிகழ்கின்றன. 2003 முதல் 2005 வரை நாசாவின் விஞ்ஞானிகள் இதை ஆராய்ந்து ஒப்புக் கொண்டுள்ளனர்.

விதியின் விளையாட்டு

காகிதங்களின்
முதல்நிலைப் பயனாளிகளும்
கடைநிலைப் பயனாளிகளும்
சந்திக்கின்றனர்.

பலநூறு ஆண்டுகளாய்
மாறா நிலையிது
எழுவரில் இருவரே
பள்ளிக்குச் செல்வது.

சுமையென்னவோ ஒன்றுதான்
தோள்கள்தான் வேறு!
பயணம் என்னவோ ஒன்றுதான்
திசைதான் வேறு!

'குட்பை' சொல்லிச்
சிலர் செல்கின்றார்!
குப்பை நோக்கிப்
பலர் செல்கின்றார்!

காகிதங்களில் உள்ளவை
உங்களுக்கு!
காகிதங்களே போதும்
எங்களுக்கு!

உங்கள் விளையாட்டுகளில்
தானென்றும் விதியிருக்கும்!
எங்களுக்கோ வாழ்வே
விதியின் விளையாட்டுத்தான்!

ஆசிரியர்கள்

கறைநீக்கும் அக்கறையில்
இக்கரைக்கும் அக்கரைக்கும்
பலரையும் கரைசேர்த்துக்
கரையாடும் படகுகள்.

நிலவிலா இருட்டிலும்
பனையலைப் புயலிலும்
தொலைதூரப் புள்ளியாய்க்
கலங்கரை விளக்கங்கள்.

தான்நின்ற இடத்திலே
அசையாமல் தான்நின்று
வருவோரை மேலேற்றிக்
களிகொளும் மாடிப்படிகள்.

தகுந்த வழியைத்
தகுந்த தருணத்தில்
தகுந்த போக்கருக்குத்
தான்காட்டும் கைகாட்டிகள்.

முட்களாய்த் தோன்றினாலும்
ஒரேயிடத்தில் சுற்றினாலும்
மேன்மையைத் தவறாது
அறிவிக்கும் கடிகாரங்கள்

அறிவுப் பொக்கிஷத்தைக்
கதவெலாம் திறந்துகாட்டிக்
கதவோரம் காத்திருக்கும்
இருப்புச் சாவிகள்.

அறியாமை இருளகற்ற‌
தீபத்தால் தீபமேற்றி
அறிவொளி அணையாமல்
அடைகாக்கும் மணிவிளக்குகள்.

உண்டு நிறையா
உறுபசி விருந்தைக்
கொடுத்துக் குறையா
அட்சய பாத்திரங்கள்

வெம்மை தான்கொண்டு
தண்மை நமக்களித்து
நிலவாய் நாமொளிர‌
வழிகாட்டும் ஆதவர்கள்

பிழையெலாம் பொறுத்துக்
கண்காணாக் கடவுளைக்
மனங்காணச் செய்யும்
அடையாளத் தூதுவர்கள்

இஃதென்ன?

இஃதென்ன?
புன்னகைச் சுரங்கம் அரங்கம் ஏறுதோ?
குதூகலக் கப்பல் பவனி துவங்குதோ?
இன்பக் கருவூலக் கதவு திறக்குதோ?
மகிழ்ச்சி மடைதிறந்து கடலாய் நிறையுதோ?
வல்லினக் கரத்தில் மெல்லினம் இழையுதோ?
தோஷமில்லாச் சந்தோஷம் எங்கும் பரவுதோ?
கடைகாணா நகைகள் கடைவாயில் கிடைக்குதோ?
ஏழ்மைச் செல்வம் குபேரனை வெல்லுதோ?
உள்ளத்தின் பல்லக்கில் வெண்மை விளங்குதோ?
உள்ளதில் வாழ்வதால் இன்மை குறையுதோ?
இன்றில் வாழ்வதால் நாளை மறந்ததோ?
பயணம் துவங்கிட வழியும் தெரியுதோ?

ஆயுதக் கவிதை

நரியதன் வண்ணம்
      நூறாய்
            ஆயிரமாய்
                  லட்சமாய்க்
                        கோடிகளாய்
                              லட்சக் கோடிகளாய்
                                    ஊழல் வளர்ந்திருந்தால்
                              வெற்றுக் கேடிகளாய்
                        பேடிகளாய்ப்
                  பிச்சைகளாய்
            கேவலமாய்ச்
      சோறின்றித்
திரிவதும் திண்ணம்!

பொய்யென...

அரசியல் அடிதடிக்கும்
ஆர்ப்பாட்டக் கயமைக்கும்
ஆன்மீகக் கபடத்துக்கும்
சோரமான உழைப்புக்கும்
தாந்தோன்றிச் சிறுமைக்கும்
தான்னோக்கும் கொடுமைக்கும்
வியாபாரக் கல்விக்கும்
நடுநில்லா நீதிக்கும்
வீரநாண‌மில்லா ஆண்மைக்கும்
நாணவீர‌மில்லாப் பெண்மைக்கும்
பரிசாயின்று வானமும்
பொய்யெனப் பொய்த்ததோ?

அடிமையும் சுதந்திரமும்...

அடிமையும் சுதந்திரமும்...

கருப்புக் கும்மிருட்டில்
பெருக்கல் குறியிட்டு
அடிமையாய்க் குறுகிப்
பனிக்குடத்தில் தலைகீழாய்த்
தசமாதத் தவமிருந்தேன்.
வலிகொடுத்து வழிபெற்று
வெளிவந்த கோலத்திலே
கண்ணள்ளிய ஒளிவெள்ளக்
காட்சியதைக் கவனிக்காது
கவலையின்றி மறந்திட்டேன்!
காலம்போன காலத்திலே
கண்சொருகித் திரைவிழுந்து
விழிவிரித்துப் பார்த்தாலும்
ஒளிசுருங்கிப் போகையிலே
காண்கின்ற காட்சிய‌து
மனத்திரையில் புகைப்படமாய்
நிலைக்குமா? என்னுங்
கவலையிலே திளைத்துக்
காட்சியையே மறந்திட்டேன்
வாழ்க்கை நாடகத்தின்
திரைவிழுந் தருணத்தில்
காட்சிகளே சாட்சிகளாய்
அனைவரும் நினைக்கையில்
திரைகாட்டும் வெறுமையில்
பெருக்கல் குறியிட்டுக்
கருப்புக் கும்மிருட்டில்
சுதந்திரமாய்க் கலந்துவிட்டேன்!

கும்கி - 9

இன்னும் பலப்பல அதிசயம் பகர்வேன்
அறிந்து நினைந்து நினைந்து மகிழ்வீர்
பரந்து பட்டபூமிப் பந்தில் நாங்கள்
உவந்து வாழும் ஆயுள் அறிவீரோ?
மனிதர்க்கு நூறு எமக்கோ ஆயிரமென்றே
ஏளனமாய்ச் சொல்லி கும்கி குதித்தது!

ஆ!என்ன! சொல்ல‌து மெய்யா பொய்யா?
என்றபடி செல்வன் செல்வியைப் பார்த்தான்.

இருப்பதை விடுத்துப் பறப்பதைப் பார்ப்பதில்
மனிதர்க்கு என்றும் நிகரேதும் உண்டோ?!
எமதாயுள் அதிகமெனுங் கவலையை விடுவீர்!
எமதர்மன் வருநாளை யாரறிவார் சொல்வீர்!
மனிதர்க்கு ஆயுளொரு நூறு ஆண்டாம்
எமக்கிங்கு உளதோ ஆயிரம் நாளாம்
வாநாள் முழுதும் உழைப்பின்றி வீணே
நாறும் நூறால் பலனென்ன சொல்வீர்?

குறைபட்ட ஆயுளை விளக்க‌க் கேட்டதும்
தேய்ந்திட்ட‌ நிலவாய்ச் செல்வி சோர்ந்தனள்.
வெறும் மூவாண்டில் என்னதான் செய்வாயோ?
இப்போது வயதென்ன? சொல்நீ! என்றே
அடுக்கு அடுக்காய்க் கேள்வியைத் தொடுத்தாள்!

இருக்குங் காலத்தில் மகிழ்வுட னிருந்தால்
அருகும் ஆயுளால் கவலை வருமோ?
சீரோடு ஊராண்டு உலகாண்டு களித்திட்டேன்
மூவாண்டில் ஓராண்டு இன்றோடு கழித்திட்டேன்
யான்பிறந்த நாளில் வருந்த ஏதுமிலை!
மழலைகள் நீவிர் மகிழ்ந்து ஆடுவீர்!

பிறந்த நாளென்றால் எங்கிருந்து வருமோ?
அவ்விடத்து வந்தே நிறைந்தது குதூகலம்!
சுணைக்கால் பிடித்துக் குலுக்கினான் செல்வன்!
நீஆணா? பெண்ணா? கேட்டாள் செல்வி!

இனிக்கும் பசும்பாலும் குறளெனும் முப்பாலும்
தாய்மைப் பெண்பாலும் கம்பீர ஆண்பாலும்
எப்பாலும் வருதற்கும் முப்போதே அப்போதே
உருவான குடியானவர் நாங்கள் எமக்குள்
ஆண்பால் பெண்பால் பேதமில்லை அறிவீர்!
இருபாற் குணமும் ஒருங்கே கொண்டு
அரிதாய் விளங்கும் அர்த்தநாரி காண்பீர்!
இன்னும் ஏதேதோ சொல்லத் துவங்க‌
செல்வி! செல்வா! அழைத்தார் பாரதி!

தொடரும்...

கும்கி - 8

பார்க்கச் சிறியோன் என்றே நினைத்தீரோ
தீர்க்கக் காரியம் புரியும் என்னை?
மூர்த்தி சிறிதானும் கீர்த்தி பெரிதெனல்
ஆர்க்கும் இறைக்கும் என‌க்கும் பொருந்தும்!

பாரியின் தேரிலன்று முல்லை வளைந்தாற்போல்
செல்வியின் விரலில் சொகுசாய் வளைந்தாடி
மூச்சுக்கும் சொல்லுக்கும் இடைவெளி விடாது
கீச்சுக் குரலில் கும்கி பகன்றது.

ஒருவிரல் நசுக்கலில் உயிரளவு கொண்டாலும்
பெருமை அடிப்பதில் அடிக்க ஆளில்லையே!
பிள்ளைப் பருவத்தீ ரென்றே ஏளனமோ?
பள்ளி சென்றறிவு கொள்வதும் அறிவாயோ?

காதும் குத்தியாச்சு! யாரும் அங்கே
சுற்றிப் பூவைக்க இடமும் இல்லை!
சொல்வ தெல்லாம் கேட்டுத் தலையாட்டிச்
செல்வியிவள் செல்லாள்! அறிவா யென்றாள்!

நடுநிசி போலும் இருண்ட மாநிழலில்
சமதளத்தில் சமுக்கமாய் சருகு நீக்கிக்
கிடைத்த இடத்தில் கவனப் பக்குவமாய்க்
கும்கியைக் கீழிறக்கி மெதுவாய் விடுத்தாள்!

ஏமாற்ற ஏமாற நானோ மனிதனில்லை!
வழிவழி வந்த அறிவிருக்க எமக்குப்
பள்ளியும் செல்லத் தேவையும் இல்லை!
எம்கதை சொல்வேன் தெளிய அறிவீர்!

வெள்ளையர் கருப்பர் குட்டை நெட்டையர்
மூக்கு சிறுத்தோர் தங்க முடியோர்
இன்னுஞ் சில‌விதமென‌ மானுடர் இருப்பர்
எமக்கோ ஈராயித்து இருநூறு இனமுண்டு!

மண்தோன்றி வளந்தோன்றாப் பழைய காலம‌தில்
மண்தோண்டிச் சிறந்தோங்கப் பரமன் படைத்தனன்!
பழுதேதும் இன்றி உழுதுண்டு வாழ்ந்து
தரிசான வயலைப் பரிசாக்கும் பணியெமது!

ஆண்டுகள் கொண்டு கொஞ்சம் அளந்தால்
வாண்டுகள் நீங்கள் கோடிகோடிப் புதியோர்!
இறுக்கப் பூமியிளக்கிய பழங்குடி நாங்கள்
நேற்றுப் பிறந்த புதுக்குடியினர் நீங்கள்!

கும்கி சொல்லில் சந்தேகம் இருப்பின்
நூற்புழுவாய் மாறி நூலகஞ் சென்று
வைட், லாயிட், டார்வின் போன்றோர்
எம்மைப் பற்றிச் சொன்னதைப் படிப்பீர்!

ஏதேதோ சொல்லும் கும்கியைக் கண்டு
தோதாய்ச் சம்மணிட்டு எதிரெதிர் அமர்ந்து
ஒருமித்துக் கருத்தைக் காதில் வைத்தபடி
இருந்தனர் நம்பியும் நம்பாமலும் தும்பிகள்.

(தொடரும்)

உலகைப் புரட்டிப் போட்ட 100 அறிவியல் கண்டுபிடிப்புகள் - 32

32. உலகின் முதல் டினோசர் படிமம் (First Dinosaur Fossil)

கண்டறிந்தவர்கள்: ஜிடியோன் மேன்டெல் மற்றும் வில்லியம் பக்லேண்ட் (Gideon Mantell and William Buckland)

கண்டறிந்த ஆண்டு: 1824

விஞ்ஞானிகள் உட்பட அனேகமானோர் இவ்வுலகில் இப்போதிருக்கும் உயிரினங்களும், மரம், செடி, கொடி வகைகளும் உலகம் தற்போது இருப்பது போலவே தான் எப்போதும் இருந்து வருகின்றது என்று நம்பினார்கள். இந்த நம்பிக்கையை டினோசர்களின் படிமங்கள் உடைத்தெறியும் வண்ணம் இருந்தன. அது மட்டுமன்றி அவைகளின் படிமங்களின் மூலம் நாம் கற்பனையே செய்து பார்க்க முடியாத அளவிலும் வடிவத்திலும் பல மிருகங்களும் புவியில் வாழ்ந்து தற்போது உருத்தெரியாமல் அழிந்திருக்கின்றன என்று கண்டறிய முடிந்தது.

இது தொல்பொருள் மற்றும் வரலாற்றுக் காலத்துக்கு முந்தைய உயிரியல் ஆராய்ச்சியில் ஒரு மிகப்பெரிய திருப்புமுனை என்றால் அது மிகையானதல்ல. சாதாரண மனிதனால் எளிதில் புரிந்து கொள்ள முடியாத பரிணாம வளர்ச்சியைக் கொண்டிருந்த டினோசர்கள் வியப்பில் ஆழ்த்தும் வண்ணம் முற்காலத்தில் வாழ்ந்திருக்கின்றன என்று நிரூபணம் ஆனது.

எவ்வாறு கண்டறியப்பட்டது?

எலும்புகளின் படிமங்கள் முன்பே கண்டறியப்பட்டிருந்தாலும், அவைகள் வழக்க‌ழிந்து போன மிருகங்களினுடையவை என்று யாருமே கற்பனை செய்து பார்க்கவில்லை. 1677ல் ராபர்ட் ப்ளாட் எனும் ஆங்கில விஞ்ஞானி கண்டுபிடித்த படிம எலும்பு 220 ஆண்டுகள் கழித்து அது ஒரு மிகப்பெரிய மாமிசபட்சிணி டினோசரின் தொடை எலும்பு என்று கண்டுபிடிக்கப்பட்டது! அதைக் கண்டறிந்த போது அது ஒரு பெரிய மிருகத்தின் விரை என்று கூறி அதன் மூலம் புகழ் பெற்றிருந்தார் ப்ளாட். அறிவியலைப் பொருத்தவரை இரு ஆங்கில விஞ்ஞானிகள் தனித்தனியே 1824ல் கண்டறிந்து வெளியிடும் வரை இந்த விஷயத்தில் ஒரு இருண்ட பகுதியாகவே இருந்தது. எனவே அவ்விருவரும் டினோசரைக் கண்டுபிடித்ததைப் பகிர்ந்து கொண்டனர்.

1809ல் (டார்வினின் பரிணாமக் கொள்கைக்கு 50 ஆண்டுகளுக்கு முன்பு) ஆங்கில நாட்டுப்புற வைத்தியரான ஜிடியோன் மேன்டெல் இங்கிலாந்தில் லிவிஸ் என்ற ஊரில் வாழ்ந்து வந்தார். ஒரு நோயாளியைக் காணச் சென்ற போது மேன்டெல்லின் மனைவி மேரி ஆன் அவரிடம் ஒரு பெரிய பையிலிருந்து சில பற்களை எடுத்து அவரிடம் காட்டினார். அந்தப் பற்கள் மிகப் பெரியதாக இருந்ததோடன்றி, அது ஒரு சைவபட்சிணியின் பற்கள் என்பதும் அவ்வளவு பெரிய பற்கள் கொண்ட மிருகம் தற்போது கிடையாது என்பதும் ஆச்சரியப்படும் வகையில் இருந்தது. மேன்டெல் புவியியலிலும் தன்னார்வம் மிகுந்தவர் என்பதால், முற்கால விலங்குகளின் படிமங்களைப் பல ஆண்டுகளாக சேகரித்து வந்தார். அவரால் அப்பற்களை எம்மிருகத்தினுடையது என்று அடையாளம் காண இயலவில்லை. ஆனால் அவரால் அந்தப் பற்கள் கிடைத்த இடத்திற்குச் சென்று அங்கிருந்த பாறைகளின் வயதைக் கொண்டு அவை மெசோசிக் காலத்தையது என்றும் பல மில்லியன் ஆண்டுகளுக்கு முந்தியது என்றும் அறிந்து கொள்ள முடிந்தது. 

(நன்றி: விக்கிபீடியா)

அவ்விடத்தில் அவருக்குக் கிடைத்த முதல் பொருள் இந்தப் பல் அல்ல. ஆனால், இந்தப் பல் தான் மிக அதிசயிக்கத்தக்க அளவில் இருந்தது. அவர் அதை புகழ்மிக்க பிரெஞ்ச் இயற்பியலாளர் சார்லஸ் சூவியரிடம் சென்று காட்டினார். அவரோ அந்தப் பல் ஏதாவது காண்டாமிருகம் போன்ற மிருகத்தின் பல்லாக இருக்கும் என்று யூகித்தார். அதன் பின் மேன்டெல் அதைத் தனியே ஒரு புறமாய் வைத்துக் கொண்டார்.

1822ல் இக்வானா எனும் பல்லி இனத்தின் பற்களைக் கண்டபோது அவை தாம் 13 ஆண்டுகளுக்கு முன்பு கண்ட பற்களின் மிகச் சிறிய வடிவமாக இது இருக்கின்றதே! என்று அதிசயமாக ஒப்பிட்டுப் பார்த்தார் மேன்டெல். அந்தப் பல் கிடைத்த இடத்தில் கிடைக்கப்பெற்ற மற்ற எலும்புகளுடன் சேர்த்து வைத்துப் பார்த்து விட்டு மேன்டெல் தான் பழங்காலத்தில் வாழ்ந்து அழிந்து போன பல்லி இனத்தைச் சார்ந்த ஒரு மாபெரும் மிருகத்தைக் கண்டறிந்ததாக அறிவித்தார். அதற்கு இக்வானாடூன் (இக்வானா பல் கொண்ட) என்றும் பெயர் சூட்டினார். அவரது கண்டுபிடிப்பை 1824ல் அதிகாரபூர்வமாக வெளியிட்டார்.

அதே காலகட்டத்தில் ஆக்ஸ்போர்டு பல்கலையில் பேராசிரியராக இருந்த வில்லியம் பக்லேண்ட் இங்கிலாந்தின் ஸ்டோன்ஸ்பீல்ட் பகுதியில் படிமங்களைச் சேகரித்துக் கொண்டிருந்தார். 1822ல் அவர் ஒரு பழங்கால மாபெரும் மிருகத்தின் தாடை மற்றும் பல தொடை எலும்புகளைக் கண்டறிந்தார். அதே மிருகம் தான் 150 ஆண்டுகளுக்கு முன்பே ராபர்ட் ப்ளாட் கண்டறிந்த மிருகம் என்றும் ஆனால் அவரால் சரியாக இனங்காண முடியாத மிருகம் என்பதும் குறிப்பிடத்தக்கது.

பக்லேண்ட் அம்மிருகம் இரண்டு கால்களை உடைய ஒரு மாமிச பட்சிணி என்று கண்டறிந்தார். அதன் எலும்பமைப்பைக் கொண்டு அது ஒரு ஊர்வன/பல்லி இனத்தைச் சேர்ந்தது என்று அறிவித்தார் பக்லேண்ட். அதை அவர் மெகாலோசரஸ் (மாபெரும் பல்லி) என்று பெயரிட்டு அழைத்து அதை 1824ல் அதிகாரபூர்வமாக வெளியிட்டார். இவ்விரு அறிவியல் கண்டுபிடிப்புகளின் மூலம் டினோசர்களின் காலம் வெளிச்சத்துக்கு வந்தது.

உலகைப் புரட்டிப் போட்ட 100 அறிவியல் கண்டுபிடிப்புகள் - 31

31. மின்காந்தவியல் (Electromagnetism)

கண்டுபிடித்தவர்: ஹான்ஸ் ஓயெர்ஸ்டெட் (Hans Oersted)

ஆண்டு: 1820

1820 வரை காந்தம் என்பது இயற்கையாகக் கிடைப்பது என்றே நம்பப்பட்டு வந்தது. மிகவும் பலம் குன்றிய காந்தமான இது திசைகாட்டியாகவும் ஒரு அதிசயமாகவும் மட்டுமே பார்க்கப்பட்டு வந்தது. ஆனால், இன்றைய பல மோட்டார்களிலும், மின்சாரம் தயாரிப்பதற்கும் மின்காந்தம் பெரிய அளவில் பயன்படுகின்றது. இவ்வளவு ஏன்? அன்றாடம் நாம் வீடுகளில் பயன்படுத்தும் அசையக் கூடிய அனைத்து இயந்திரங்களிலும் இயக்கக்காரணியாக விளங்குவது இந்த மின்காந்தம் தான்!

ஓயெர்ஸ்டெடின் இந்த அரிய கண்டுபிடிப்பு நவீன அறிவியலின் அணையை மடை திறந்து விடுவதாக இருந்தது என்று தான் கூறவேண்டும். இவரது கண்டுபிடிப்பு பின்னாளில் மைக்கேல் ஃபாரடே மற்றும் ஆண்ட்ரே ஆம்பியர் ஆகியோரின் கண்டுபிடிப்புகளுக்கும் காரணமாக விளங்கியது.

ஓயெர்ஸ்டெட் எவ்வாறு கண்டறிந்தார்?

1777ல் தென் டென்மார்க்கில் பிறந்தார் ஓயெர்ஸ்டெட். பல்கலைக்கழகத்தில் அறிவியல் பயின்றாலும் அவருக்கு தத்துவத்தில் தான் ஈடுபாடு அதிகம் இருந்தது. அனைத்து இயற்கை விசைகளிலும் ஒரு ஒற்றுமை இருப்பதாக நம்பிய ஜான் ரைட்டரின் வழி நடப்பவராக இருந்தார் ஓயெர்ஸ்டெட். அனைத்து இயற்கை விசைகளையும் ஆராய்ந்தால் அவை இறுதியில் உர்க்ராஃப்ட் எனும் முதன்மை விசையைச் சென்றடைவதாக இருக்கும் என்று நம்பினார். 1813ல் அறிவியல் கற்றுத்தரும் ஆசானாக நியமிக்கப்பட்ட போது, அவரது நம்பிக்கையை நிரூபிக்க அனைத்து வேதியியல் விளைவுகளையும் கொண்டு உர்க்ராஃப்டைக் கண்டுபிடிப்பதன் மூலம் அனைத்துக்கும் ஒரே காரணம் என்ற முடிவை எடுப்பத‌ற்காக ஆராய ஆரம்பித்தார்.

பெஞ்சமின் ஃப்ராங்க்ளினின் ஆய்வுகளால் நிலைமின்சாரம் குறித்தும் லேய்டன் குடுவைகளில் சேமிக்கப்பட முடிகின்ற சக்தியிலிருந்து கிளம்பும் தீப்பொறிகள் குறித்தும் ஆராய்ச்சிகள் துவங்கப்பட்டு ஆர்வமும் அந்நாளில் காட்டப்பட்டது. 1800 வாக்கில் வோல்டா மின்கலத்தைக் கண்டுபிடித்தார். அதன் மூலம் தடையில்லா மின்சாரம் கிடைக்கும் நிலை ஏற்பட்டது. மின்சாரம் என்பது அறிவியலின் அதிசயமாக உருவானது. 1800க்கும் 1820க்கும் இடையில் 68 புத்தகங்கள் மின்சாரத்தைப் பற்றியே வெளியிடப்பட்டன.

விஞ்ஞானிகளில் வெகுசிலர் மட்டுமே மின்சாரத்திற்கும் காந்தத்திற்கும் தொடர்பிருக்கக் கூடும் என்று சந்தேகித்தனர். 1776 மற்றும் 1777 ஆண்டுகளில் பவாரியன் அறிவியல் பயிற்சிக்கூடம் ஒரு பரிசை அறிவித்தது! மின்சாரம் மற்றும் காந்தத்திற்கும் தொடர்பு ஏதும் உண்டா எனும் கேள்விக்குப் பதிலளிப்போருக்கு பரிசளிப்பதாகக் கூறப்பட்டது. யாரும் அப்பரிசை வெல்லவில்லை! 1808ல் லண்டன் அறிவியல் சங்கமும் இதே கேள்விக்கு ஒரு பரிசை அறிவித்தது. அப்போதும் யாரும் வெற்றி பெறவில்லை!

1820ன் இளவேனிற்காலத்தில், ஹான்ஸ் ஒயெர்ஸ்டெட் ஒருசமயம் வகுப்பில் தனது உரையை நிகழ்த்திக் கொண்டிருக்கும் போது ஒரு அதிசயம் நிகழ்ந்தது. வகுப்பறையில் மாணவர்களுக்கு முன் தனது மாபெரும் கண்டுபிடிப்பை அவர் நிகழ்த்தினார். அது கல்லூரி மாணவர்களுக்கான எளிதான சோதனையாகும். எவ்வாறு மின்சாரம் ஒரு பிளாட்டினம் கம்பியைச் சூடாக்குகின்றது? என்பதே அந்தச் சோதனை. ஒயர்ஸ்டெட் மின்சாரத்திலோ காந்தவியலிலோ தனது கவனத்தைக் காட்டியவரல்லர். இருந்தாலும் ஒரு திசைகாட்டியைத் (காந்த ஊசி) தனது மேஜையில் இந்தச் சோதனை நிகழும் போது வைத்திருந்தார்!

மின்கலத்தில் கம்பியை வைத்துத் தொட்டதுமே காந்த ஊசி சடாரென்று பிளாட்டினம் கம்பியை நோக்கிச் செங்குத்தாகத் திரும்பி நின்றது! மின்கலத்திலிருந்து கம்பியை அகற்றியதும் காந்தம் பழைய நிலைக்குத் திரும்பி விட்டது! ஒவ்வொரு முறை அவர் மின்கலத்தைப் பிளாட்டினம் கம்பி கொண்டு தொட்டதும் காந்த ஊசி திரும்புவதும் பின் பழைய நிலைக்குச் செல்வதுமாக ஆட்டம் காட்டியது! இது அனைத்தும் வகுப்பு மாணவர்களின் முன்னிலையில் நடந்தேறியது! மாணவர்களின் கவனம் முழுதும் அதில் சென்றதால் ஒயர்ஸ்டெட் தனது உரையின் போக்கை மாற்றி வகுப்பைத் தொடரலானார்.

அதன் பின்னும் ஒயர்ஸ்டெட் அடுத்த மூன்று மாதங்களில் கோடை வரும் வரை இந்த அதிசயம் குறித்து ஆராய்ச்சி செய்யவில்லை. அதன் பின்னர் தான், மின்சாரம் காந்தத்தின் மீது என்ன விசையைப் பிரயோகிக்கின்றது என்று கண்டறிய முற்பட்டார். இதைக் கொண்டு உர்க்ராஃப்டைக் கண்டறிய முடியுமா என்ற சிந்தனை தான் அவருக்கு இருந்தது.

அவரும் கம்பியை காந்த ஊசியின் மேலே, கீழே, இரு புறங்களிலும் என்று வைத்துப் பார்த்தார். பின்னர் மின்சாரத்தின் ஓட்டத்தை மாற்றிக் கொடுத்துப் பார்த்தார். ஒரு கம்பிக்குப் பதிலாக இரண்டு கம்பிகளைக் கொண்டு ஆய்வைச் செய்து பார்த்தார். ஒவ்வொரு முறை கம்பியை அசைக்கும் போதும் அது காந்த ஊசியின் மேல் ஏற்படுத்தும் அசைவை மிகக் கவனமாகக் கண்காணித்தார். ஒயர்ஸ்டெட் இறுதியாக மின்சார ஓட்டமும், காந்தமும் கவர்ச்சி மற்றும் விலகல் ஆகிய விசைகளை ஒரே நேரத்தில் கொண்டிருப்பதை உணர்ந்தார். சில மாதங்கள் ஆய்வுக்குப் பின்னர், மின்சார ஓட்டம் தன்னைச் சுற்றி ஒரு காந்தப் புலத்தை உருவாக்குவதைக் கண்டறிந்தார். அது நியூட்டன் குறிப்பிட்டது போல் அல்லாமல் புதிய ஒரு விசையாக இருப்பதையும் கண்டார். இந்த விசை நேர் கோடுகளில் செல்லாமல், தன்னைச் சுற்றி வட்டமான பாதையில் சென்றது. குறிப்பாக, மின்சாரம் ஏந்திய கம்பிகள் காந்தத்தின் அனைத்துப் பண்புகளையும் கொண்டிருந்தன. இதன் மூலம் மின்காந்தவியல் என்பது கண்டறியப்பட்டுவிட்டது.

ஒயர்ஸ்டெடைக் கௌரவிக்க டென்மார்க் அரசு ஒருபுறம் அவரது படத்தையும் மறுபுறம் காந்த ஊசியையும் கொண்டு நோட்டை வெளியிட்டு சிறப்பித்தது. (நன்றி: விக்கிபீடியா)

உலகைப் புரட்டிப் போட்ட 100 அறிவியல் கண்டுபிடிப்புகள் - 30

30. மூலக்கூறுகளின் இருப்பு (The Existence of Molecules)

கண்டறிந்தவர்: அமீடியோ அவோகேட்ரோ (Amedeo Avogadro)

ஆண்டு: 1820

பொருட்கள் அனைத்தும் அணுக்களின் தொகுப்பால் ஆனது என்றாலும் எந்த ஒரு பொருளையும் பிரித்துப் பார்த்தால் அது தனித்தனி அணுவால் ஆனதாக இல்லை. உலகில் இருக்கும் அனைத்துப் பொருட்களுக்கும் எவ்வாறு குறைந்த அளவு எண்ணிக்கையில் இருக்கும் கூறுகளால் ஆக்கப்பட்டவையாக இருக்கின்றன என்று அவோகேட்ரோ கண்டறிந்து கூறும் வரை யாருக்கும் அதைப் பற்றிய எண்ணம் உதிக்கவில்லை.

அவரது கண்டுபிடிப்பும் அவோகேட்ரோ எண்ணும் அங்கக, அனங்கக வேதியியலில் பெரும் மாற்றத்தை ஏற்படுத்தியதுடன், எண்ணிக்கை வேதியியல் மற்றும் வாயு விதிகளின் பிறப்பை உறுதி செய்வதாய் இருந்தது.

அவோகேட்ரோ எவ்வாறு கண்டறிந்தார்?

1811ன் வேனிற்காலத்தில், ஒருநாள் 35 வயது பேராசிரியர் அவோகேட்ரோ வகுப்பறையில் அமர்ந்திருந்தார். அவரது கைகளில் இரண்டு அறிவியல் குறிப்புகள் கொண்ட காகிதங்கள் இருந்தன. இத்தாலிய மலைப்பிரதேசமான டூரினில் வெர்சிலி கல்லூரியில் இயற்கை அறிவியல் வகுப்புகள் எடுத்துக் கொண்டிருந்தார் அவர். 25 மாணவர்கள் அவருக்கு விருப்பமான அறிவியலில் அவர் கூறும் பல விஷயங்கள் பற்றிக் குறிப்பெடுத்துக் கொண்டும் சந்தேகங்களை நிவர்த்தி செய்து கொண்டும் இருந்தனர். அன்றைய தினம், அவ்விரு அறிவியல் காகிதங்களையும் சுட்டிக் காட்டி அவற்றில் ஒரு புதிர் இருப்பதாகவும் அதை மாணவர்கள் கண்டறியவேண்டும் என்றும் கேட்டுக் கொண்டார் அவோகேட்ரோ.

அவ்விரு காகிதங்களும் ஆங்கில வேதியியல் விஞ்ஞானி டால்டனும், பிரெஞ்சு வேதியியல் விஞ்ஞானி கேய் லஸ்ஸாக்கும் தனித்தனியே எழுதியவை. ஒவ்வொருவரும் அதில் எவ்வாறு ஆக்சிஜன் மற்றும் ஹைட்ரஜன் அணுக்களைச் சேர்த்து நீராக உருவாக்குவது என்பது பற்றி எழுதியிருந்தனர். அவர்களது சோதனையில் மிகச் சரியாக இரண்டு லிட்டர் ஹைட்ரஜன் வாயு அணுக்களையும், ஒரு லிட்டர் ஆக்ஸிஜன் வாயு அணுக்களையும் சேர்த்தால் மிகச் சரியாக இரண்டு லிட்டர் நீராவி அணுக்கள் கிடைக்கும் என்று கண்டுபிடிக்கப்பட்டிருந்தது! டால்டன் தனது சோதனையின் மூலம் நீர் என்பது ஹைட்ரஜனின் இரண்டு அணுக்களையும் ஆக்சிஜனின் ஒரு அணுவையும் சேர்த்துக் கிடைப்பது என்று நிரூபித்திருந்தார். கேய் லஸ்ஸாக் தனது சோதனையின் மூலம், ஒரு லிட்டர் கொள்ளள‌வில் எந்த ஒரு வாயுவின் அணுக்களின் எண்ணிக்கையும் அது எந்த வாயுவாக இருந்தாலும் சரி சமமான எண்ணிக்கையிலேயே இருக்க முடியும் என்று நிரூபித்திருந்தார்.

இவ்விரு ஆராய்ச்சிக் கட்டுரைகளும் மிகப் பெரிய புரட்சியையே ஏற்படுத்தி இருந்தன. ஆனால், அவோகேட்ரோவின் முதல் வாசிப்பிலேயே அவர் அவற்றிலிருக்கும் முரண்பாடுகளை ஏற்றுக் கொள்ள முடியாதவராக இருந்தார். டால்டன், கேய் லஸ்ஸாக் இருவருமே இரண்டு லிட்டர் ஹைட்ரஜன் மற்றும் ஒரு லிட்டர் ஆக்ஸிஜனுடன் தான் தமது ஆராய்ச்சியைத் துவங்கியிருந்தனர். ஆக, மொத்தம் அங்கே இருப்பது மூன்று லிட்டர் வாயு அணுக்கள். ஆனால் இருவருமே இரண்டு லிட்டர் நீராவி அணுக்களுடன் தான் தங்கள் ஆய்வை முடித்திருந்தனர். ஒவ்வொரு அணுவின் ஒவ்வொரு லிட்டர் அளவும் ஒரே அளவு எண்ணிக்கையில் அணுக்களைக் கொண்டிருக்குமானால், எப்படி மூன்று லிட்டர் அணுக்களும் சேர்ந்து இரண்டு லிட்டர் நீராவி அணுக்களுக்குள் அடைத்து வைக்கப்பட முடியும்? நள்ளிரவில் டூரின் தேவாலய மணி ஒலித்த போது அவோகேட்ராவுக்கு ஞானோதயம் பிறந்தது! "டால்டனும் கேய் லஸ்ஸாக்கும் தங்கள் ஆராய்ச்சியில் பயன்படுத்திய சொற்கள் தான் தவறாக இருக்க முடியுமே அன்றி ஆராய்ச்சியே தவறாக இருக்காது. ஒரு நீர் அணு என்பது ஏன் இரு வித அணுக்களின் குழுவாக இருக்க முடியாது? ஓர் அணு என்பதற்குப் பதிலாக ஓர் அணுக்குழு என்று இட்டால் சரியாக இருக்குமோ?" இது தான் அவோகேட்ராவின் எண்ணத்தில் உதித்ததாகும்.

அவோகேட்ரோ இந்த சேர்ந்து பரவும் அணுக்குழுவுக்கு மூலக்கூறு என்னும் சொல்லை உருவாக்கினார். (molecule என்பதற்கு கிரேக்க மொழியில் வாயுக்களின் ஊடே சுதந்திரமாக உலாவுதல் எனும் பொருளாகும்.) அதன் பின்னர் அவர் பல சமன்பாடுகளை உருவாக்கி அதன் மூலம் மூலக்கூறுக்கும் அவற்றில் இருக்கும் அணுக்களுக்கும் எண்ணிக்கையைச் சமன் செய்தார்.

ஒரு ஹைட்ரஜனின் மூலக்கூறில் இரண்டு ஹைட்ரஜன் அணுக்களும், அதே போல் ஒரு ஆக்ஸிஜன் மூலக்கூறில் இரண்டு ஆக்ஸிஜன் அணுக்களும் இருந்து, அதே போல் ஒவ்வொரு நீர் மூலக்கூறிலும் இரண்டு ஹைட்ரஜனும், ஒரு ஆக்ஸிஜன் அணுவும் இரு விஞ்ஞானிகளும் கூறியது போல இருந்தால் ஒவ்வொரு லிட்டரில் இருக்கும் ஹைட்ரஜன் மூலக்கூறு எண்ணிக்கை மற்றும் ஒவ்வொரு லிட்டரில் இருக்கும் ஆக்ஸிஜன் மூலக்கூறு எண்ணிக்கையும் சேர்ந்து மிகச் சரியாக இரண்டு லிட்டர் நீராவி மூலக்கூறு எண்ணிக்கைக்குச் சமமாக இருக்கும். அவற்றிலிருக்கும் அணுக்களின் எண்ணிக்கை வித்தியாசமாக இருக்கலாம். ஆனால் அவற்றிலிருக்கும் மூலக்கூறுகளின் எண்ணிக்கை தான் மாறாமல் இருக்கும் என்று கண்டறிந்தார்.

இதன் மூலம், எந்த ஒரு ஆய்வகத்துக்கும் செல்லாமல், ஒரு சோதனைக் குழாயைக் கூடத் தொடாமல், அடிப்படை வேதியியல் கூட அறியாமல் மூலக்கூறின் இருப்பைக் கண்டறிந்தார் அவோகேட்ரோ! அவர் தமது கண்டுபிடிப்பின் மூலம் அடிப்படை வாயு விதியை நிறுவினார். அதாவது ஒவ்வொரு லிட்டர் வாயுவும் ஒரே அளவு தன்னுள் மூலக்கூறு எண்ணிக்கையைக் கொண்டிருக்கும். அது எந்த வாயுவாக இருந்தாலும் சரி! ஒரு லிட்டர் அளவில் ஒரே அளவு வெப்பம் மற்றும் அழுத்தத்தில் மூலக்கூறுகளின் எண்ணிக்கை மாறுவதில்லை. சரிசமமாக இருக்கும் என்பதே அவரது விதி!

உலகைப் புரட்டிப் போட்ட 100 அறிவியல் கண்டுபிடிப்புகள் - 29

29. மின்வேதித் தளை (Electrochemical Bonding)

கண்டறிந்தவர்: ஹம்ப்ரி டேவி (Humphry Davy)

காலம்: 1806

மூலக்கூறுகளில் இருக்கும் அணுக்களின் தளைகள் யாவும் மின்மயமானது என்று கண்டறிந்தார் டேவி. தற்போது நாம் இந்த வேதித் தளைகள் எல்லாம் அணுக்களில் இருக்கும் மின்னேற்றம் பெறப்பட்ட உட்துகள்களை (எலக்ட்ரான்கள்) பங்கிடுவதாலோ அல்லது மாற்றிக் கொள்வதாலோ நடைபெறுகின்றது என்று புரிந்து கொண்டிருக்கின்றோம். ஆனால் 1800களில் வேதியியலில் மின்சாரம் அங்கம் வகிக்கின்றது என்று கண்டறிவது என்பது ஒரு புரட்சிகரமானது என்பதை ஒத்துக் கொள்ளத் தான் வேண்டும். அத்தகைய புரட்சியைச் செய்தவர் தான் டேவி. மின்வேதியியல் எனும் புதிய உபபிரிவையே உருவாக்க வகை வகுத்தது அவரது கண்டுபிடிப்பு. எவ்வாறு வேதிபொருட்கள் வினைபுரிந்து ஒன்றுடன் ஒன்று இணைந்து புதிய பொருட்கள் உருவாகின்றன என்பதில் புதிய வரையறையை உருவாக்கியது டேவி எனலாம். இந்த முறையைப் பயன்படுத்தி டேவி இரண்டு புதிய மிகமுக்கியமான வேதிப்பொருட்களைக் கண்டறிந்தார். அவை சோடியம் மற்றும் பொட்டாசியம் ஆகும். 

இனி டேவி எவ்வாறு இவற்றைக் கண்டறிந்தார் என்று பார்க்கலாம்.

ஹம்ப்ரி டேவி 1778ல் இங்கிலாந்தின் கடற்கரையோர கார்ன்வெல் எனும் பகுதியில் பிறந்தார். குறைந்தபட்ச பள்ளிப்படிப்பையே கொண்டிருந்த அவர் தாமே படித்தறிந்து தனது அறிவினை விரிவாக்கிக் கொண்டார். தனது பதின்ம வயதிலேயே ஒரு அறுவை சிகிச்சை நிபுணர் மற்றும் மருந்து தயாரிப்பவரிடம் உதவியாளராகப் பணிபுரிய ஆரம்பித்தார். ஆனாலும், பிரெஞ்ச் விஞ்ஞானி ஆண்டனி லவாய்ஸியரின் கட்டுரைகள் அவரை அறிவியலின்பால் ஈர்த்தன.

1798ல் இங்கிலாந்து ப்ரிஸ்டலில் தாமஸ் பெட்டோஸ் எனும் பணக்கார வேதியியல் விற்பன்னரிடம் ஆய்வகத்தில் வேலை செய்யும் வாய்ப்பு அவருக்குக் கிடைத்தது. அங்கே அவர் பல வேதியியல் ஆராய்ச்சிகளைச் சுதந்திரமாகச் செய்து கொள்ளும் அதிர்ஷ்டம் கிடைத்தது. 1799ல் அவர் வாயுக்களை ஆய்வு செய்வதில் ஈடுபட்டிருந்தார். கண்ணுக்குத் தெரியாத வாயுக்களைச் சோதனை செய்வதற்கு அவற்றை முகர்ந்து பார்ப்பது மட்டுமே சிறந்த வழி என்றும் எண்ணியிருந்தார். நைட்ரஜன் ஆக்ஸைடை முகர்ந்து பார்த்து மயக்க நிலைக்குச் சென்றார். அப்போது எல்லாவற்றையும் மறந்து சந்தோசமாகவும் வலிமையாகவும் உணர்ந்தார். அதனால் சிரிப்பூட்டும் வாயு என்று அதற்குப் பெயர் வந்தது. அதை ஞானப்பல்லைப் பிடுங்கி எடுக்கும் போது பயன்படுத்தினார். அதனை அவர் தனது கட்டுரையில் குறித்திருந்த போதும் அதன் பின்னர் 45 ஆண்டுகள் கழித்தே நைட்ரஜன் ஆக்ஸைட் மயக்கமருந்தாகப் பயன்படுத்தப்பட்டது. 

கார்பன் டை ஆக்ஸைடையும் டேவி சோதனை செய்து பார்த்தார். அதைச் சுவாசித்துக் கிட்டத்தட்ட மரணிக்கும் தருவாய்க்குச் சென்றதும் நடந்தது. ஒரு திரைப்படக் கதாநாயகன் போல அழகாக இருந்த டேவி அதற்குத் தகுந்தாற்போல நேர்த்தியாக உடையும் அணிந்து வலம் வருபவராக இருந்தார். அவரது கண்டுபிடிப்புகளைப் பெரிய மேடையில் பலரும் ரசிக்கும் வண்ணம் பிரம்மாண்டமாகச் செய்து காட்டுவதில் வல்லவராகவும் திகழ்ந்தார் என்பது குறிப்பிடத்தக்கது!

1799ல் இத்தாலிய அலெஸாண்ட்ரோ வோல்டா மின்கலத்தைக் கண்டறிந்ததுடன் உலகிலேயே முதன்முறையாக செயற்கை மின்னோட்டத்தையும் உருவாக்கிக் காட்டினார். 1803 வாக்கில் டேவி பெட்டோஸிடம் 110 இரட்டைத் தட்டுகள் கொண்ட மிகப்பெரிய மின்கலத்தை உருவாக்கவேண்டும் என்று கேட்டார். அதன் பின்னர், தனது முழுக்கவனத்தையும் மின்கலங்களை ஆராய்ச்சி செய்வதில் திருப்பினார் டேவி. மின்கலத்தின் எலெக்ட்ரோடில் பல உலோகங்களையும் ஏன் கரிக்கட்டையையும் பயன்படுத்திப் பார்த்தார். அதே போல் நீர் அமிலம் போன்ற பல திரவங்களையும் மின்கலத்தின் தட்டுகளுக்கிடையே பயன்படுத்தப்படும் எலெக்ட்ரோலைட்டாகப் பயன்படுத்திப் பார்த்தார். 

1805ல் டேவி மின்கலத்தில் இணைத்த போது ஸிங்க் எலெக்ட்ரோட் ஆக்ஸிடைஸ் ஆவதைக் கண்டறிந்தார். அது ஒரு மின்னோட்டத்தால் நடைபெற்ற வேதிவினையாகும். மற்ற எலெக்ட்ரோட்களிலும் இதேபோன்று வேதிவினை மாற்றங்கள் நடைபெறுவதையும் அவர் கண்டறிந்தார். இதன்மூலம் மின்கலத்தில் இருந்து வரும் மின்னோட்டத்தால் வேதிவினைகள் நிகழ்வதைக் கண்டுகொண்டார் டேவி. 

1806ல் நடைபெற்ற ஒரு பிரம்மாண்டமான கூட்டத்தின் முன்னிலையில் திரவ நீரின் மேல் மின்சாரத்தைப் பாய்ச்சி அதை ஹைட்ரஜன் மற்றும் ஆக்ஸிஜன் வாயுவாகப் பிரித்துக் காட்டினார்! நீரின் மூலக்கூறுகள் பிளவுபெற்று வாயுக்களாக ஆவதைக் கண்டு கூட்டம் அதிசயித்து நின்றது! வேதித் தளையை உடைக்க மின்சாரத்தால் முடியும் என்று நிரூபணம் ஆனது. டேவியைப் பொருத்தவரை இதற்கு முன் இவ்வாயு அணுக்களைத் தளையில் கட்டி வைத்திருந்தது மின்னோட்டம் என்பதாலேயே அதை மின்னோட்டத்தால் உடைக்க முடிகின்றது என்பது தான். இல்லையென்றால் மின்சாரத்தால் அத்தளையை உடைக்க முடியாது என்று அவர் நம்பினார். இதன் மூலம் அணுக்களிடையே ஏற்படும் உறவின் அடிப்படை அமைப்பைக் கண்டறிந்தவர் ஆனார். இதன்மூலம் வேதிவினையின் முக்கியக்காரணியாக‌ மின்னோட்டம் இருப்பது கண்டறியப்பட்டு பெரிய விஞ்ஞானப் புரட்சிக்கு அது வித்திட்டது.

டேவி தனக்கு முன்னால் இருந்த அனைத்து வேதிப்பொருட்களையுமே எலெக்ட்ரோட்களாகப் பயன்படுத்தி தனது ஆராய்ச்சியைத் தொடர்ந்தார். 1807ல் அவர் 250 ஸிங்க் மற்றும் தாமிரத் தட்டுகளை உடைய மிகச் சக்தி வாய்ந்த மின்கலத்தைப் பயன்படுத்தி காஸ்டிக் பொட்டாஷில் சோதனை செய்து எலெக்ட்ரோடில் பொதிந்த ஒரு புதிய வேதிப் பொருளைக் கண்டறிந்தார். நூதனமாக ஒளி விட்டு எரிந்த‌ அப்புதிய வேதியியல் பொருளுக்கு பொட்டாசியம் என்று பெயரிட்டார். அதற்குப் பிறகு ஒரு மாதத்தில் சோடியத்தையும் இதே போன்று தனிமைப்படுத்தினார். இவ்வாறு டேவி மிக முக்கியமான இரண்டு அடிப்படைக் கூறுகளைக் கண்டுபிடித்தார்.

உலகைப் புரட்டிப் போட்ட 100 அறிவியல் கண்டுபிடிப்புகள் - 28

28. அணுக்கள் (Atoms)

கண்டறிந்தவர்: ஜான் டால்டன் John Dalton

ஆண்டு: 1802

நவீன அறிவியலின் வேதியியல் மற்றும் இயற்பியல் பிரிவுகளில் அணுக்களின் பங்கு அளவிடற்கரியது. 1938களில் மின்னணு நுண்ணோக்கிகள் வரும்வரை யாரும் கண்ணால் அணுக்களைக் கண்டதில்லை. சில நூற்றாண்டுகளுக்கு முன்பே அணுக்களைப் பற்றிய அறிவும் அதன் சிறப்பும் பயன்பாடுகளும் பற்றி மனித இனம் அறிந்திருக்கின்றது. ஜான் டால்டன் அணுக்களின் வரையறையை உருவாக்கி அணுக்களின் நிலையில் பல ஆராய்ச்சிகள் செய்ய‌ வழிகோலியிருக்கின்றார். எந்த ஒரு பொருளுக்கும் மிக நுணுக்கமான அடிப்படை அணு என்பதும் வெவ்வேறு அணுக்களைக் கொண்டு விதம் விதமாகக் கட்டப்பட்டதே நாம் இன்று உலகில் காணும் அத்தனை பொருட்களும் என்பதை நாம் அறிந்திருக்கின்றோம்.

வேதியியல் மற்றும் இயற்பியலைப் புரிந்து கொள்வதற்குச் சாவியாக அணுக்கள் பயன்படுத்தப்படுவதால் ஜான் டால்டனின் கண்டுபிடிப்பு அறிவியல் வரலாற்றில் மிகப்பெரிய திருப்புமுனையாகக் கருதப்படுகின்றது. இதனால் அவரை நவீன இயற்பியலின் தந்தை என்று அழைக்கின்றோம். இனி எவ்வாறு ஜான் டால்டன் அணுக்களைப் பற்றிக் கண்டறிந்தார் என்று பார்க்கலாம்.

கி.மு. 5ம் நூற்றாண்டில் மிலெடஸின் லியோசிப்பஸும் (Leucippus of Miletus) அப்தேராவின் டெமோக்ரிடஸும் (Democritus of Abdera) கொள்கைநிலையில் ஒவ்வொரு துகளையும் இன்னும் சிறு துகளாக உடைத்துக் கொண்டே செல்லலாம் என்று கூறியிருக்கின்றார்கள். இறுதியில் அவ்வாறு உடைக்க முடியாத பொருளுக்கு அணு என்றும் பெயரிட்டனர். கலிலியோவும் நியூட்டனும் அதே பொருள்பட அணு என்ற பெயரைப் பயன்படுத்தியிருக்கின்றனர். ராபர்ட் பாய்லேவும் ஆண்டனி லவாய்ஸியரும் புதிய வேதிப் பொருட்களைக் கண்டறியும் போது கூறு (element) என்ற சொல்லைப் பயன்படுத்தினர். ஆனாலும் இவை அனைத்துமே சித்தாந்தத்தின் அடிப்படையில் அமைந்தவையே அல்லாமல் அறிவியல் பூர்வமாக கண்டுபிடிக்கப்படவோ அல்லது சோதனைகள் மூலம் நிரூபிக்கப்படவோ இல்லை.

1766ல் இங்கிலாந்து மான்செஸ்டரில் பிறந்த ஜான் டால்டன் குறைந்த பள்ளிப் படிப்பையும் கல்லூரிப் படிப்பையும் கொண்டிருந்தாலும், 20 ஆண்டுகளாக தாதுப்பொருட்களை ஆராய்ச்சி செய்வதிலும் பள்ளி/கல்லூரிகளில் மதப் பிரச்சாரம் செய்வதிலும் ஈடுபட்டார். இறுதியில் பிலாசபிகல் சொசைட்டியில் பல கட்டுரைகளையும் சமர்ப்பித்திருக்கின்றார். அவைகளுள் பாரோமீட்டர், தெர்மாமீட்டர், ஹைக்ரோமீட்டர், மழையளவு, மேகங்கள் உருவாக்கம், ஆவியாதல், காற்றுமண்டல ஈரப்பதம், உறை நிலை ஆகியவை அடக்கம். ஒவ்வொரு கட்டுரையும் புதிய கொள்கைகளையும் அக்காலத்தில் அறிந்திடாத ஆராய்ச்சி முடிவுகளையும் கொண்டிருந்தது.

இதனால் ஜான் டால்டன் மிகவும் பிரபலமானார். எனவே தனது முழு கவனத்தையும் அறிவியல் ஆராய்ச்சியின் பக்கம் திருப்பினார் டால்டன். 1801 வாக்கில் காற்று மண்டலத்திலிருந்து தனது கவனத்தை வேதிப் பொருட்களின் பக்கம் திருப்பினார். அவருக்கு வேதியியலில் எந்த முன் அனுபவமும் கிடையாது. இருந்தாலும் நம்பிக்கையுடன் அதிலேயே ஆராய்ச்சிகளைத் தொடர்ந்தார். அந்தச் சமயத்தில் 50 வேதிப் பொருட்கள் பட்டியலிடப்பட்டிருந்தன. அவை உலோகங்கள், வாயுக்கள், உலோகங்களல்லாதவை என்று வகை பிரிக்கப்பட்டிருந்தன. என்ன தான் பலவித பொருட்களைக் கண்டறிந்தாலும், விஞ்ஞானிகளால் எவ்வாறு உலகில் இருக்கும் பொருட்கள் மற்ற பொருட்களுடன் இணைந்து இன்னொரு பொருளாக உருவமெடுக்க முடிகின்றது? என்ற‌ அடிப்படைக் கேள்விக்குப் பதில் தெரியாமல் இருந்தது. எடுத்துக்காட்டாக, ஹைட்ரஜன் வாயுவும், ஆக்ஸிஜன் வாயுவும் இணைந்து நீர்த்துளியாக எப்படி உருவமெடுக்கின்றது? என்பது அறியாமல் இருந்தனர். மேலும் 1 கிராம் ஹைட்ரஜன் எவ்வாறு மிகத் துல்லியமாக 8 கிராம் ஆக்ஸிஜனுடன் மட்டும் இணைந்து வினை புரிகின்றது? இந்த அளவு அதிகமாகவோ குறைவாகவோ எப்போதுமே இருப்பதில்லையே ஏன்? போன்ற கேள்விகளுக்குப் பதிலறியாமல் விழித்துக் கொண்டிருந்தனர்.

டால்டன் அனைத்து வேதியியல் வினைபுரிதல்களையும் ஆராய்ந்து எவ்வாறு பொருட்கள் உருவாகும் போது அடிப்படைத் துகள்கள் நடந்து கொள்கின்றன என்று ஒரு பொது கொள்கையை உருவாக்க முயற்சித்தார். அவர் ஒவ்வொரு வேதிப் பொருளின் எடையையும் ஆராய்ந்து அவற்றில் இருக்கும் மூல காரணிகள் எவ்வாறு பொருளின் கட்டமைப்பில் பங்கு பெறுகின்றன என்று ஆராய்ந்தார். ஒரு ஆண்டு ஆராய்ச்சியின் பின்னர், ஒவ்வொரு பொருளும் அவற்றின் எடையின் கணித வீதத்தில் அமைவதாக முடிவு செய்தார். அவரது இந்த முடிவு ஏற்கனவே கண்டறிந்த வேதியியல் பொருட்களில் (காற்று, நீர், ஈதர் ... ) இருக்கும் மூலக் காரணிகளின் அளவை எளிதில் கண்டறியும் வண்ணம் இருந்தது.

இது அவரது வேதியியல் தத்துவத்தில் வெவ்வேறு மூலக்கூறு மற்றும் அணுக்களின் அமைப்புகளின் படம். (நன்றி விக்கிபீடியா)

டால்டனின் கொள்கைப் படி, ஒவ்வொரு வேதியியல் பொருளும் உடைக்கமுடியாத மிக நுண்ணிய துகள்களால் சரியான முறையில் அடுக்கப்படுவதால் உருவானதாகும். அவர் இத்துகள்களுக்கு கிரேக்கர்கள் இட்ட பெயரான ஆட்டம் (atom) என்ற பெயரையே இட்டார். இதன் மூலம் இச்சொல் வேதியியல் சிறப்புப் பொருள்படும் குறிச்சொல்லானது. ஒரு பொருளின் எல்லா அணுக்களும் ஒரே மாதிரியான ஒத்த பண்புகளையே கொண்டிருக்கும் எனவும், அவற்றை வேறொரு பொருளின் அணுக்களுடன் சரியான வீதத்தில் இணைத்தால் வேறொரு தெரிந்த பொருளாக உருவாக்க முடியும் என்றும் காட்டினார். ஒவ்வொரு பொருளும் குறிப்பிட்ட எண்ணிக்கையில் அணுக்களை மூலப் பொருட்களிலிருந்து கொண்டிருந்தன. அந்த எண்ணிக்கை வீதம் மாறுபடுவதே இல்லை. பொருளின் ஒவ்வொரு அடிப்படைத் துகளிலும் இந்த வீதம் மாறுபடாமல் இருப்பதையும் கண்டறிந்தார். எனவே நீரை H4O2 எனக் குறிப்பதைக் காட்டிலும் H2O என்று குறிப்பது எளிமையானது என்றும் இதே வீதத்திலேயே ஹைட்ரஜன் மற்றும் ஆக்ஸிஜன் அணுக்களைக் கொண்டிருக்கின்றது என்றும் அறிய வந்தது.

ஒவ்வொரு அணுவுக்கும் ஆங்கில எழுத்துகளைக் கொண்டு H, O போன்று குறியீடுகளின் மூலம் ஒவ்வொரு மூலப் பொருளையும் குறித்தார் டால்டன். இது தானே எங்களுக்கு வேண்டும் என்று அவரது ஆராய்ச்சி முடிவுகளையும், கண்டுபிடிப்புகளையும் மேற்கத்திய அறிவியல் உலகம் வாரி எடுத்துக் கொண்டது எனலாம். அவரது அணு சார்ந்த அறிவியல் கொள்கைகளை நாம் இன்றளவும் பயன்படுத்துகின்றோம் என்பது குறிப்பிடத்தக்கது.

உலகைப் புரட்டிப் போட்ட 100 அறிவியல் கண்டுபிடிப்புகள் - 27

27. மயக்கமருந்து (அனஸ்தீசியா) Anesthesia

கண்டறிந்தவர்: ஹம்ஃப்ரி டேவி (Humphry Davy)

கண்டறிந்த ஆண்டு: 1801

அக்காலத்தில் அறுவை சிகிச்சையின் போது ஏற்படும் வலி காரணமாகவே அறுவை சிகிச்சை செய்து கொள்ளாதவர்கள் அதிகம். மயக்கமருந்து கண்டுபிடிக்கப்பட்டதாலேயே பல உயிர்களை மருத்துவரீதியாகக் காப்பாற்ற முடிந்தது என்பதை யாரும் மறுக்கவே முடியாது. அத்தகைய மயக்க மருந்து எவ்விதம் யாரால் கண்டறியப்பட்டது என்று காணலாம்.

1846ல், Oliver Wendell Holmes என்பவரால் உணர்ச்சியற்ற எனும் பொருள் தரும் அனஸ்தீசியா எனும் கிரேக்க மொழிச் சொல் பயன்பாட்டுக்கு வந்தாலும், இந்த மயக்க மருந்து முறை என்பது பல மருத்துவர்களாலும் ஆயிரக்கணக்கான ஆண்டுகளுக்கும் முன்பே செயல்பாட்டில் இருந்து வந்தது தான். முற்கால சீன மருத்துவர்கள் மூளைக்குச் செய்தி அனுப்பும் நரம்புகளை அக்குபஞ்சர் ஊசிகளின் மூலம் நிறுத்தி வைத்து அறுவை சிகிச்சையின் போது வலியேற்படாமல் தவிர்த்திருக்கின்றனர். ரோமானிய மற்றும் எகிப்திய மருத்துவர்கள் மாண்ட்ரகோரா எனும் செடியின் வேரை (மான்ட்ரேக்) பயன்படுத்தி நோயாளிகளை மயக்கமுறச் செய்திருக்கின்றனர். கோக்கோ இலைகளைக் கடித்து மென்று அதன் சாறைப் புண்களின் மீது துப்பி அதன் மூலம் வலியைக் குறைக்கச் செய்ததும் உண்டு.

19ம் நூற்றாண்டில் மூன்று வெவ்வேறு அறிவியலாளர்கள் நவீன அனஸ்தீசிய முறையைக் கண்டறிந்ததாகக் கூறினாலும், அதற்கு முன்பே ஹம்ஃப்ரி டேவி இம்முறையைக் கண்டறிந்து விட்டார். 

ஸ்காட்லாந்தில் சர் யங் சிம்ப்சன் க்ளோரோபார்ம் எனப்படும் மருந்தை பஞ்சில் முக்கி அதை நுகரச் செய்வதன் மூலம் மயக்க நிலையை எட்டச் செய்யும் முறையைக் கண்டறிந்தார். 1838ல் விக்டோரியா ராணி தனது ஏழாவது குழந்தையைப் பிரசவிக்கும் போது க்ளோரோபார்மைப் பயன்படுத்தும் வரை அந்த முறை பிரபலமடைந்திருக்கவில்லை. அதன்பின்னர் க்ளோரோபார்ம் வரலாற்றில் பல போர்களில் முக்கியமாக அமெரிக்க சிவில் யுத்தத்தின் போது பயன்படுத்தப்பட்டிருக்கின்றது.

ஜார்ஜிய மருத்துவர் க்ராஃபோர்ட் லாங் ஈதரைப் பயன்படுத்தி வலியைக் குறைக்க முயற்சி மேற்கொண்டார். ஒரு நீதிபதியின் கழுத்துப் பகுதியில் அறுவை சிகிச்சையின் போது ஈதரைப் பயன்படுத்திச் சிறப்பாக அறுவை சிகிச்சையைச் செய்து முடித்தார். அந்த நீதிபதி எந்த ஒரு வலியையும் உணர முடியவில்லை. 1842ல் இதைச் செய்த லாங் இதை விளம்பரப்படுத்திக் கொள்ளவில்லை. இரண்டாண்டுகள் கழித்து பாஸ்டனில் வெல் எனும் பல்மருத்துவர் ஈதரைப் பயன்படுத்தி வலியைக் குறைப்பதை அறிந்து கொண்டார். ஆனாலும் அவர் அறுவைசிகிச்சையின் போது ஈதரைச் செலுத்தும் அளவைக் குறைத்ததால் விரைவிலேயே வலியால் நோயாளி துடித்து விட்டார்.

1845ல் போஸ்டனின் இன்னுமொரு பல்மருத்துவர் வில்லியம் மார்ட்டன் மீண்டும் ஈதரைப் பயன்படுத்தி அறுவை சிகிச்சையைச் செம்மையாகச் செய்து முடித்தார். அவரது மயக்கமருந்தாக ஈதரைப் பயன்படுத்தும் முயற்சி குறித்த கட்டுரைகளே பின்னர் அமெரிக்க மற்றும் ஐரோப்பிய மருத்துவர்கள் பலரும் ஈதரை முதன்மையான மயக்கமருந்தாகப் பயன்படுத்த ஆரம்பித்தனர்.

இவ்வாறு மூவர் மயக்கமருந்து குறித்துக் கண்டறிந்திருந்தாலும், ஹம்ஃப்ரி டேவி 1801 லேயே நைட்ரஜன் மற்றும் ஆக்சிஜனைக் கலந்து நைட்ரஸ் ஆக்சைடைக் கண்டறிந்து அதற்கு சிரிப்பூட்டும் வாயு என்று பெயரும் இட்டார். அதிகமாக அதை உட்கொண்டால் மயக்கமும் நேரிட்டதைக் கண்டறிந்த அவர், அதனை மருத்துவமனைகளில் நோயாளிகளின் வலியைக் குறைக்கப்பயன்படுத்தலாம் என்று குறிப்பும் எழுதி வைத்தார். 

யாரும் அதைக் கண்டுகொள்ளவில்லை என்றாலும் கூட டேவி தான் முதன்முதலில் நவீன மயக்கமருந்து குறித்த கண்டுபிடிப்பை நிகழ்த்தினார் என்பதே உண்மை.

பரிசாக் கிடைச்சதெலாம்...

திங்கஆகாத் தங்கத்துக்கு மதிப்பைப் பாரய்யா!
பொங்கும் அன்னபூரணியை மதிப்ப தாரய்யா?

வெளஞ்ச நெல்லைக் கூட்டிஅள்ளி வித்துப்பாத்தாலும்
வெலையில்லாக் கொடுமையை நான்என்னான்னு சொல்லுவேன்?

கடலுக்குள்ள முழுகுனாலும் மிதந்து வந்துடலாம்
கடனுக்குள்ளே முழுகுனதை நான்என்னான்னு சொல்லுவேன்?

கோமணந்தான் மிஞ்சிருக்கு இருப்பு வகையிலே
மத்ததெல்லாம் காத்திருக்கு அடகுக் கடையிலே

பரிசாக் கிடைச்சதெலாம் நட்டந் தானய்யா!
தரிசாப் போட்டாக்கூட லாபந் தானய்யா!

உரத்தால‌ தாய்ப்பாலுஞ் சாக்கடை யாச்சு
வெதவெதமா விதைபோட்டு மலடு மாச்சு

பேஞ்சுபேஞ்சு கெடுப்பதுவும் மழை தானய்யா
பேயாமாலே கெடுப்பதுவும் மழை தானய்யா!

இளைச்சு இளைச்சு ஒடம்பெலாம் ஓடாத்தேயுது
வளைச்சு வளைச்சு நிலமெல்லாம் வீடாமாறுது!

நேத்து வந்துகருங்காலி விலையைப் பேசுறான்
பெத்ததாயை வித்துப் போட்டா கேவலமய்யா!

கும்கி - 7

அண்ணா ஈங்கோர் அதிசயம் பாரேன்!
அழைத்தனள் கூவி செல்வனைச் செல்வி
அத்தோடு நின்றாளா? அவனைத் தேடியே
துள்ளி யோடினாள் மான் போலவே.

அலுவலகஞ் செல்லும் காலைப் பேருந்தில்
கடைசிப் படியில் ஒருகாலை வைத்து
ஒருகையால் கம்பியில் தொங்கிச் செல்வதாய்
பாவம் கும்கிக்குத் தலையெலாஞ் சுற்றிற்று.

பேசும் மண்புழு!
பேசும் மண்புழு!
மண்புழு! மண்புழு!
வளையுது பார்!
நெளியுது பார்!

நீர்நிறை புட்டியைத் தலைகீழாய்க் கவிழ்த்தால்
கழுத்து முட்டித் தடுமாறும் நீரெனச்
சொற்கள் தட்டித் திக்கி விழுந்தன!
செல்வனும் எட்டி அதிசயமாய்ப் பார்த்தான்!

மழலைகள் முகந்தனில் குதூகலம் கண்டு
பின்வந்த முருகையன் இதழ்களில் முறுவல்
மகிழ்வின் உச்சியில் இளக்கம் இயல்பன்றோ?
துளிர்த்தன‌ கண்ணீர் பூக்கள் ஆனந்தமாய்!

மேலே கருமையும் கீழே வெண்மையுமாய்
உடலெங்கும் வரிசையாய்க் கோர்த்த வளையங்கள்
தலையருகே சுணைக்கால் கொண்டு நகரும்
கும்கியைக் கண்கள் விலக்காமல் பார்த்தனர்!

செல்வனும் செல்வியும் ஆர்வமாய்ச் சேர்ந்து
குறுகுறு பார்வையில் துளைத்துச் செய்த
மண்புழு ஆராய்ச்சி தந்தது கும்கிக்குச்
சொல்லொணாக் கூச்சமும் படபட வெட்கமும்.

நன்றாய்ப் பார்ப்போமெனச் சூரிய ஒளியில்
சென்றே தொடர்ந்தனர் தமது ஆராய்ச்சியை!
கதிரவன் கதிரைத் தாங்குமோ மண்புழு?
காயத்தில் காயம் பெற்றே சுருண்டிடுமே?

போதும்! போதும்! என்னை விடுங்கள்!
கதிரவன் கதிரோ தணலாய்த் தகிக்குதே!
கதறிய கும்கியைக் காக்க எண்ணியே
நிழலுக்கு வந்தனர் மூவரும் விரைந்து!

யாது மறியாது செய்த பிழைபொறுப்பாய்!
தோழராய் எம்மை ஏற்றே மன்னிப்பாய்!
உனைப் பற்றி அறியா யெமக்குச்
சொல்வாயோ அறியும்படி கொஞ்சம் விளக்கமாய்?

கேட்டாள் அன்பது ததும்ப‌ச் செல்வி
விட்டால் வழியத் தயாராய் அணைகட்டி
அவள்கண் நின்ற கண்ணீரைக் கண்டதும்
உருகியது கும்கி! செறுமியது குரலை!

(தொடரும்)

நட்சத்திர மினுக்கல்

நட்சத்திர மினுக்கல்

பசிக்குப் புசித்தான்!
புசிக்க‌ ருசிக‌ண்டு
ருசியோடு புசித்தான்!
ருசிக்கப் புசித்தான்!
அநிச்சைப் புசித்தலில்
ருசிபசி மறந்தான்!
இப்போதோ பாவம்
நட்சத்திர மினுக்கலில்
எச்சில் விழுங்குகிறான்.

ஏடு தாங்காது!

சுருங்கி விருட்சத்தைப் பொதியும் விதையும்
மண்ணில் புதைந்து கர்ப்பம் தரிக்கையில்
வேரிலை கிளைபல விரவி வளர்ந்திடும்;
துவக்கம் தந்தை பெருக்கம் தாய்மை

உயிர் ஆண்மை; உடல் பெண்மை
வித்து ஆண்மை; சத்து பெண்மை
உயிர் காக்கும் பொருள் உடலாம்
உயிர் இருப்பின் பொருள் உடலாம்

பத்துத் திங்கள் உள்ளே சுமந்தும்
பத்தாது நித்தமும் மனதில் சுமந்து
பித்தாய்ப் பதறி பெரிதுங் கலங்கி
முத்தாய் முகிழ்த்த‌ சிப்பியாம் தாய்மை

தாய்மை போற்றுதும் தாய்மை போற்றுதும்
சேய்மை காத்திடும் தாய்மை போற்றுதும்
தம்மெய் உருக்கி யுதிரப் பாலூட்டி
உம்மை வளர்த்த தாய்மை போற்றுதும்!

ஒருகூறைச் சேலை; ஒருவாய்ச் சோறு;
ஒருபாய்த் தோது; வேறேதும் வேண்டா!
ஈதுந் தராது துரத்திடு மவலத்தைத்
தாய்மைக்குத் தராதீர்! ஏடு தாங்காது!

கும்கி - 6

இயற்கைத் தூரிகை வரைந்த நவீனஓவியம்
முயற்சிப் புழுஎட்டிய வெற்றிச் சிகரம்
சிறகாலே பூவிரிக்கும் வண்ணத் தூதகம்
மதுவாலே திளைக்கும் வாழ்க்கைப் பயணம்

நூறாய்ப் பறக்கக் கண்கொளாக் காட்சியில்
எதைத் துரத்த எதை விடவெனச்
செல்வன் ஆருக்கும் பிடிபடாது பறந்தான்
தானுமொரு வண்ணத்துப் பூச்சியென எங்கும்

கிணற்று ஆழத்தைக் கண்ணால் வியந்தபடி
எல்லை எதுவரை தமதென அளந்தபடி
தம்பதியர் அமர்ந்தனர் எளிமைச் சுகமாம்
பின்னிப் போட்டிருந்த கயிற்றுக் கட்டிலில்

குற்றாலமாய்ப் பாய்ச்சிய நீரின் வேகத்தைக்
கைநீட்டித் தடுத்துப் பார்த்துத் தோற்றதில்
செல்விக்கு முகமெங்கும் முத்தாய் விழுப்புண்கள்!
வாய்க்கால் கால்நனைத்துச் செய்தனள் உடன்படிக்கை

வரப்பெங்கும் நீர்வழிப் பாட்டையில் நடந்தாள்
இருமருங்கும் நெற்கதிர் தலைவணங்க ராணியாய்
அறுவடைக்குத் தயாரென்று இராமையா விளக்க
புதிதான சொற்களைப் புரியாமல் சிரித்தாள்.

வரப்பினின்று இராமையா கைபற்றி ஏறினாள்
காற்பெருவிரல் சுற்றியபடி மெல்லிய கயிறு
கயிறென்று நினைத்துக் கையெடுத்து நீக்கினாள்
கயிறல்ல வளைந்து நெளிந்தது ஒருஜந்து.

பாம்பென்றே பயந்து அலறித் தவித்தாள்
உதறிய கையை நீங்காது பற்றியதது
பாம்பன்று மண்புழு என்றையம் நீக்கினார்
அவ்விடம் அனைத்தும் அறிந்த இராமையா.

புழுவாவென்றே பொசுக்கென்று நசுக்கப் போனாள்
வேண்டாமம்மா என்றே தடுத்தார் தாத்தா
நானுமுயிர் தானே என்றொரு குரலும்வர
ஆச்சரியமா யங்குமிங்கும் தலைதிருப்பிப் பார்த்தாள்

மண்புழு பேசுமா? அவளுடன் பேசிற்று!
உனக்குப் பேசவும் வருமோ என்றாள்
உயிர்போந் தருவாயில் எல்லாம் வருமென்றது!
வியந்ததன் பெயர்கேட்கச் சொன்னது 'கும்கி'யென! 

(தொடரும்)

கும்கி - 5

முதல்வந்து அமர்ந்த செல்வனின் முன்னிருக்கை
முகஞ்சுருங்கி அழுத செல்விக்கே கிடைத்தது!
மாசுநிறை நகரநரகம் பின்நகரச் சென்றனர்
பாசிநிறை கிராமச் சொர்க்கம் நோக்கி

கருப்புச் சாலைகள் நீண்டெங்கோ செல்ல‌
பசுமைச் சோலைகள் நோக்கித் திரும்பினர்!
அலையாடும் படகாய் வாகனமும் தலையாட்டிச்
செம்மண் சாலையில் ஓடியது புழுதிபறக்க‌!

கிராம எல்லையில் தாண்டி யார்போவாரென‌
அரிவாள் குத்தீட்டி வேற்கம்புப் படையோடு
உக்கிரமாய் நின்றிருந்தார் பரிமேல் அய்யனார் 
பயத்துடன் மழலைகள் பணிந்து வணங்கினர்!

வந்தது கிராமம் பெருவளக்கரைப் பெயர்கொண்டு
எண்ணி ஐம்பது இல்லங்கள் மட்டுங்கொண்டு
சாரைப் பாம்பாய் நெளிந்த பாதையில்
ஊரைத் தாண்டிச் சென்றது வாகனம்!

ஆழப் பதிந்த வாழை யோர்புறம்
வாழத் தந்திடும் செந்நெல் லோர்புறம்
சூழக் கரைவளர் தென்னை யோர்புறம்
நீழல் தருமினிய மாக்கூட்ட மோர்புறம்

எங்கெங்கு காணினும் பசுமை வெள்ளம்
எங்கிருந்தோ நாசியைத் தாக்கும் சுகமணம்
மேடையேறப் பயமிலாக் குயிலின் கானாமிருதம்
மெய்யைத் தீண்டிடும் தென்றல் மென்கரம்!

கண்டுமயங்கி நின்றோரைக் கண்டொருவர் ஓடிவந்தார்
தவமணியென‌க் கண்டதும் மெய்மலர்ந்து வரவேற்றார்!
உடல்வன் மையும் உள்ளமென் மையுங்கொண்டு
உடையில் மட்டும் அழுக்கிருக்கும் முருகையன்!

(தொடரும்)